जुग दो बोदोल एन।

जुग दो, जुग दो बोदोल एन,
दिसोम- दिसोम दो फेराव एन।
तोकोय मेन सारी रासी नातों कान,
तोकोय मेन सारी सान्ताड़ नातों कान।

रासी नातों कुल्ही दोया दादा ,
बानार पानते दोलान तेंगो एन।
तोकोय मेन सारी रासी आतो कान,
हासा भित लिखन बुसुप दालोप दो चाबा एन।

उसूल चुड़ा सेरमा सोमान मांझी थान,
बाय-बाय ते राकाब एन दोया दादा।
तोकोय मेनाय सारी सान्ताड़ आतो कान,
मर्सिडीज, क्रेटा आर  लेम्बोर्गिनी तेंगो एन।

धुती पांची लातार फुल पेंन्ट को होरोग एत्।
मासे जुता होरोक् दोंङ को एनेच् कान।
तोकोय मेन सारी सान्ताड़ कोड़ा-कुड़ी कान,
जिन्स होरोग मासे बाहा -सोहराय को एनेच् कान।

 िञन्दा हों हेंदे गोगल्स सिंग हों गोगल्स,
फैशन बोहोक् चेतान रे चापाड़ एन।
तोकोय को मेन सारी सान्ताड़ होपोन,

धुती दाहड़ी सारी मालोट नापोड़ एन।

33 कोटी देबी- देबता आर जीशुय बेठार एन,
मासे-मासे ल़ाय आङ  पे सान्ताड़ दो‌को‌ ओका एन?
जाहेर खोंड़ रे बोंगान को पिलचू हाड़ाम होपोन !
ओका खोंड़ रे को दानांग् चाबा एन?

बापला- बिहा़ तुम्दाक्- टामाक चाबा एन,
रूसिका- नाचोनी को सारी को आद् एन?
मोने- जीवी आकिल-बिचा़र तोका एन,
मासे सारी ला़य आङ पे सान्ताड़ दो‌को‌ ओका एन?

चाय-चाम्पा चिरुनागार बासाक् होड़,
तिहिङ दोको बेजा़त चाबा एन।
तोकोय मेनाय सारी रासी नातों कान,

गेच्- गुरीच् मांडोली हों हापिच् एन।

हापड़ाम को बेनाव बाखोल नित दो रापुद् एन,
सागाड़ गाडी , ढींकी कांडी सानाम दापाल एन।
कुंका़ल बेनाव पावरा टांगींज् हायरे लांदुड़ एन,
नाहेल काड़बा  को हों सारी निंदिर चाबा एन।

पोटोम-जोजो, हाव -चाटनी, आंसी -ओद्, रोहोड़ हाको,
चुल्हा झारा चेतान आका जोंडरा ईता चाबा एन।
गोज आका हाटाक् -खाचलाक्, मारे गुंगु ओका एन?
होतोक्- बोका, काठ-डाडू आर रीद् धीरी तोका एन?

गाय- डांगरा गोड़ा पेरेच् बितकिल- काडा,
मेरोम-भिडी, सिम-सूकरी को चाबा एन।
मासे-मासे बापु हाड़ाम सांव सानाम को चालाव एन,
मारे हापा आर माक् चातोम सांव रेयाड़ दाक् जापुद् हों हापिद् एन।

आफोर चेतान ओटांगोक् पातनी सोसरोच् ,
गाडा मुंडू रे  रोकोच् गोंघा को ओका एन?
मासे -मासे लाय आं पे बांद पेरेच् पोरायनी ,
आर गाडा पेरेच् काल्हा बाहा दो ओका एन?

सेरमा मुचाक् धाबिक् येंल मोक् कान ताहें जाहां बुरु,
तिहिं ओना नील रोंग् ओका एन?
आंजोम हिजुक् कान ताहें तुम्दाक् -टामाक साडे,
तिहिंग् ओना होय बातास ओका एन?

आयो आड़ांग् आक् ‌जाहां सेबेल सोंधाड़ सों ‌ताहें कान,
तिहिङ ओना चेदाक् ‌गुचा़व एन?
दुला़ड़ ओका ताहें ‌कान सोमाज ताला
तिहिङ चेकाते ओना दो‌ मुछा़व एन?

तोल ताहें ‌कान ओका सागाय आरीचा़ली सांव

तिहिङ चेकाते बाय-बाय ते लाम्बाव एन?

मासे ला़य आं पे गेल सेरमा- गेलबार सेरमा रे बेनाव लेक् सा़रियाड़,

तिहिङ चेकाते ओना दो‌ साय-सा़मुद थे उनुम एन?

चेतावक् -चेतावक् पे सान्ताड़ ! चिरगाल चिरगालोक् पे खेरवाड़!
हापड़ाम को एम चाल ओटो आकात् लोटा दाक् आलो दुंड़ूंजोक्!
ओनको को एम चाल ओटो आकाद् बोन बुद- आकिल,
मेत्- मारसाल आर सिखना़त- मारसाल आलो आंड़िजोक्!!

-Saheb Ram Tudu