Gur Pitha

Gur pitha

Gur pitha cini pitha,
Narak'-narak' sunum pitha.
Haire pitha! gur pitha,
Gota bochor ing disa kam do.

Hopon ayo dul pitha,
Sim sandi baha leka.
Ing ayo dul pitha 
paila-pukhuri lekam phulaw kot'a re.

Mami Burhi dul pitha,
Kortal ma jhanjh leka.
Haire pitha! Tala regem phulao kot'a re.

Marang ayo dul pitha,
Motor gadi chak leka.
Nase-nase dhare-dhare tem phulao kota re.

Jom rehom ketej-ketej,
Togoj rehom  retej-retej.
Haire pitha! Gur pitha,
Am so pitha taral basalem hui akan do.

Gorom burhie tahe kana,
Dalic' perec' gur pitha.
Haire pitha! gur pitha,
Bochor -bochor ing disa mea re.

Sebelok' rehon jom mea,
Sabagok' rehon jom me.
Haire pitha ! Sunum pitha,
Gota bochor ing uihar kam do.

Fulak' rehon jom mea,
Chopodok' rehon jom me.
Haire pitha! amdo pitha,
Oho pitha~ deya kema re.

Akhan ma jatra kan,
Tite latak' bonga pitha.
Haire pirha! towa pitha,
Am do pitha jion lagit' ge.

Sohrai kan Sakrat kan,
Am do pitham tahen gea.
Haire pitha! gur pitha,
Sawta reak arichalim jogaw akad do.

Sorog puri Sohrai rani,
Marang dai do darai kan.
Dese nayo mase nayo,
Gur pitha do nayo dul tabon me.

Dul pitha tege nayo,
Peda doko sumanok'.
Gur pitha tege nayo,
Bonga doko tirpitok'a re.

Hale ko jom jel pitha,
Sasang-sasang patra pitha.
Numin marang Sohrai nayo,
Gur pitha bang khan do micha gea re.

Gur rege sebel menak,
Gur rege herem do.
Haire pitha! sunum pitha,
Am do pitha peda koyem bodhaw kowa re.

Gur pitha cini pitha,
Narak'-narak' sunum pitha.
Haire pitha! gur pitha,
Gota bochor ing disa kam do.

©Saheb Ram Tudu



Comments

Popular posts from this blog

Jagannath Puri